पर्यटन बोर्डको बजेटले निजी क्षेत्रको मागलाई सम्वोधन गरेको दावी

काठमाडौं, १० फागुन –नेपाल पर्यटन बोर्ड सञ्चालक समितिका सदस्य फुर्वाग्याल्जेन शेर्पाले यस वर्ष पर्यटन बोर्डको बजेटले निजी क्षेत्रको मागलाई विगतका वर्षहरुको तुलनामा केही बढि नै सम्वोधन गरेको बताएका छन । सार्वजनीक–निजी साझेदारीको अवधारणा अनूरुप स्थापित बोर्डले निजी क्षेत्रसँगको आपसी सहकार्यलाई अघि बढाउन नसने मुलुकको पर्यटन प्रवद्र्धनका गतिविधी नै अधुरो हुने बताउँदै उनले बोर्डका आगामी कार्यक्रममा प्रत्यक्ष रुपमा निजी क्षेत्रलाई अघि सारेको बताए । 
नेपाल पर्यटन पत्रकार मञ्च (टीजेएफ ) नेपालले आइतबार बोर्डका सञ्चालक समितिलाई भेटेर विभिन्न माग सहितको पाँच बुँदे लिखित ध्यानाकर्षण पत्र बुझाउने क्रममा सञ्चालक समितिका सदस्य शेर्पाले यस्तो बताएका हुन ।  पर्यटन पत्रकारहरुको छाता संस्था मञ्चको ध्यानाकर्षण पत्र बुझ्दै उनले धार्मिक पर्यटन प्रवद्र्धन र विकासमा पनि विगतका वर्षहरुको तुलनामा केही बढी नै बजेट विनियोजन गरेको जानकारी गराए । बोर्डले आर्थिक विनियमावली अनुरुप नै विभिन्न शीर्षकमा विनियोजित रकम खर्च गर्ने जानकारी गराउँदै उनले सार्वजनिक खरिद ऐनले गर्दा अझै बोर्डले राम्रोसग विनियोजित बजेट समयमा खर्च गर्न नसकिरहेको बताए । मुलुकको पर्यटन प्रवद्र्धनमा पर्यटन पत्रकारहरुको भूमिका अतुलनीय रहेको बताउँदै उनले बोर्डको आगामी हरेक गतिविधिमा पर्यटन पत्रकारहरुसँग संस्थागत रुपमा सहकार्यकालागि आफुहरुले सक्दो पहल गर्ने प्रतिबद्धता व्यक्त गरे । उनले विगतमा बोर्डको कार्यक्रममा पत्रकारहरुसँगको सहकार्य व्यक्तिगत रुपमा भएको भन्ने गुनासो आएकाले  अब त्यसलाई ध्यानमा राखेर उचित संयन्त्रको विकास गर्ने प्रतिबद्धता जनाए । उनले क्रियाशिल संस्थाबाट हुने प्रवद्र्धनात्मक गतिविधीमा मात्र बोर्डले सहकार्य गर्ने बताए । संस्थागत सहकार्य भन्ने कुरालाई व्यवहारमा उतार्नु अहिलेको आवश्यकता भएको औल्याउँदै उनले पर्यटन क्षेत्रमा क्रियाशिल र चलायमान संस्थाको हिसाबले मञ्चसँगै सहकार्य गर्न सकिने धारणा राखे । 
बोर्डका अर्का सञ्चालन समिति सदस्य घनेन्द्रबहादुर श्रेष्ठले पर्यटन पत्रकारहरु पर्यटन प्रवद्र्धनको संवाहक भएको उल्लेख गर्दै बोर्डको आगामी कार्यक्रम पर्यटन पत्रकारमैत्री हुनुपर्नेमा जोड दिए । उनले बोर्डको बैठकमा यस मागलाई बहशको विषय बनाएर अघि बढ्ने बताए ।  नेपाल पर्यटन बोर्डका निमित्त प्रमुख कार्यकारी अधिकृत (सिइओ) नन्दिनीलाहे थापाले सार्वजनिक –निजी साझेदारीको अवधारणा अनुरुप सञ्चालित बोर्डले अहिलेसम्म सञ्चारकर्मीहरुका लागि छुट्टै व्यवस्था गरिएपनि त्यसलाई सबैको मर्म र भावनाअनुरुप सञ्चालन गर्न नसकिएको भन्दै आगामी दिनमा त्यसलाई ध्यानमा राखेर थप कार्यक्रम तय गर्ने प्रतिवद्धता व्यक्त गरिन ।
ध्यानाकर्षणपत्र बुझाउँदै मञ्चका अध्यक्ष शिव अधिकारीले बोर्डले विगतमा भएका गल्ति कमजोरीहरु महसुस गर्दै आगामी कार्ययोजना तय गर्नुपर्ने जिकिर गरे । उनले पर्यटन पत्रकारहरुको हकहित र अधिकार सुनिश्चित गर्न पहल गर्दा अनेक बाहानाबाजी गर्दै त्यसलाई निस्तेज पार्न खोजिए पर्यटन पत्रकार आन्दोलित हुन बाध्य हुने समेत चेतावनी दिए । उनले यसअघि मञ्चले संस्कृति, पर्यटन तथा नागरिक उडडयन मन्त्रालयका सचिव सुरेशमान श्रेष्ठलाई पनि ध्यानाकर्षण पत्र बुझाइसकेको जानकारी दिए । मञ्चले पर्यटन बोर्ड सञ्चालक समितिलाई बुझाएको पाँच बुदे लिखित ध्यानाकर्षण पत्रमा पर्यटन बोर्डले पर्यटन पत्रकारहरुसँग संस्थागत सहकार्य नगरेको भन्दै आगामी हरेक कार्यक्रमहरुमा संस्थागत सहकार्य गर्नुपर्नेमा जोड दिइएको छ । यसैगरि, सो ध्यानाकर्षणपत्रमा बोर्डको हरेक कार्यक्रमहरुमा टीजेएफ–नेपालसँग संस्थागत सहकार्य गर्नुपर्ने, पत्रकारसँग गर्नुपर्ने हरेक कामहरु टीजेएफ–नेपालसँगको सहमतिमा मात्रै गर्नुपर्ने, पत्रकारहरुको नाममा विनियोजित बजेट संस्थागत रुपमा खर्चनुपर्ने, स्वदेश तथा विदेशमा हुने पर्यटन प्रवद्र्धनात्मक कार्यक्रमहरुमा पत्रकारको सहभागिता गराउने सन्दर्भमा मञ्चको सिफारिसमा मात्रै पठाउने व्यवस्था गर्नुपर्ने तथा टीजेएफ–नेपालले स्थापना गरेको पर्यटन पत्रकारिता कल्याणकारी कोषलाई प्रभावकारी बनाउनका लागि बोर्डको तर्फबाट छुट्टै बजेटको व्यवस्था गर्नुपर्ने लगायतका माग समेटिएका छन् ।
सो कार्यक्रममा संयुक्त पर्यटन समन्वय समिति (जेटीसीसी)का संयोजक डिबी लिम्बुले पर्यटन पत्रकारहरुको सहयोग बिना  देशको पर्यटन प्रवद्र्धन र विकास हुन नसक्ने जिकिर गरे । उनले जेटीसीसीले बोर्डमा संस्थागत प्रतिनिधित्व गराउनुपर्ने विषयलाई नै उठाएर आन्दोलन गरेपनि अहिलेसम्म निजी क्षेत्रले आफ्ना माघ पूरा गर्न नसकेको बताउँदै त्यसकालागि बोर्ड गम्भिर हुनुपर्नेमा जोड दिए ।