आन्तरिक हवाइ भाडा घट्यो

मधुजंग पाण्डे÷राजधानी
काठमाडौ, १९ असार

नेपाल आयल निगमले हवाई इन्धनको मूल्य घटाएसँगै आन्तरिक हवाई भाडा पनि घटेको छ । वायुसेवा सञ्चालक संघ–नेपाल(आयोन) ले आन्तरिक उडान तर्फको हवाई भाडा केही घटाउने निणर्य गरेको हो । संघको सो निर्णय अनुसार आन्तरिक वायुसेवा कम्पनीहरुले देसभरका विभिन्न रुटका हवाइ भाडा घटाएका हुन् । संघले हवाई इन्धनको मुल्य घटेपछि सोमबारदेखि लागू हुने गरी नयाँ हवाइ भाडादर कायम गरेको हो । संघका प्रवक्ता घनश्याम आचार्यले नेपाल नागरिक उड्डयन प्राधिकरणको नियम अनुसार आइतबार बसेको संघको बैठकले आन्तरिक हवाई भाडा घटाउने निर्णय गरेको बताए । उनले हवाई इन्धनको भाउ घटबढ हुँदा यसअघिदेखि गरिदै आएको स्वचालित मुल्य अनुसार हवाई भाडा पनि सोही अनुरुप समायोजन हुँदै आएको जानकारी दिए  । उनले भाडा घटेपछि आन्तरिक उडान भर्ने यात्रुलाई केही राहात मिलेको बताए ।
संघका अनुसार काठमाडौंबाट सबैभन्दा नजिकको गन्तव्य सिमराकालागि प्रतियात्रु १ सय १५ रुपैयाँ घटाइएको छ ।  यसैगरि, सबैभन्दा टाढाको गन्तव्य धनगढीकालागि ३ सय ८५रुपैयाँ घटाइएको छ । यसैगरी, काठमाडौंबाट हरेक दिन विहानको समय हुँदै आएको माउन्टेन उडानमा प्रति यात्रु ३ सय ७५ रुपैयाँ घटाइएको छ । नेपाल आयल निगमले गत शुक्रबार देखि नै लागु हुनेगरि हवाइ इन्धनको भाउ आन्तरिक उडान तर्फ प्रतिलिटर १० रुपैयाँ घटाएर ९९ रुपैयाँ कायम गरेको थियो । निगमले हवाइ इन्धनको भाउ  घटाएपछि आफुहरुले पनि यात्रुलाई इन्धन बापत लिइँदै आएको शुल्क कटौती गर्ने निर्णय गरेको संघले जनाएको छ ।  सिम्रिक एयरलाइन्सका बरिष्ठ बजार प्रवन्धक प्रज्जवल थापाले संघको निणर्य अनुसार आन्तरिक हवाई भाडा घटाईएको बताए । उनले अहिले आन्तारिक उडानमा प्रति यात्रु न्युनतम १ सय ५० देखि ३ सय ७५ रुपैयाँसम्म भाडा घटेको जानकारी दिए  । उनले यस नयाँ भाडादर सोमबारदेखि लाग हुने बताए । उनले आयल निगमले हवाइ इन्धनको भाउ घटाएसँगै आफुहरुले फ्युल सरचार्ज पनि घटाएको बताए ।  जसका कारण हवाइ भाडा केही घटेको उनको भनाई छ ।  उनले आन्तरिक वायुसेवा सञ्चालकहरुले फ्युल  सरचार्ज बढ्दा भाडा बढाउने र घट्दा घटाउने गरिएको बताए ।  निगमले गत शुक्रबार साँझसम्म १ सय ९ रुपैयाँ प्रतिलिटरमा कारोबार भइरहेको हवाइ इन्धको मुल्य मध्यरातिदेखि लागू हुनेगरि ९९ रुपैयाँमा झारेको थियो ।
यसअघि निगमले हवाइ इन्धनको मूल्य घटाउँदा पनि आन्तरिक वायुसेवा कम्पनीले हवाइ भाडा घटाएका थिए । संघले प्रतियात्रु प्रतिमिनेटका दरले लामो तथा छोटो दुरीको गन्तव्यका आधारमा हवाई भाडा घटबढ गर्दै आएको छ ।
घटेको नयाँ भाडा दर 
देखि      सम्म    घटेको रकम  नयाँ भाडादर 
काठमाडौं पोखरा १६५   ४२३०
काठमाडौं भैरहवा २०५   ५३००
काठमाडौं बिराटनगर २३५   ६०५५
काठमाडौं भरतपुर १३५   ३०९०
काठमाडौं भद्रपुर २७५   ७३८५
काठमाडौं धनगढी ३८५   १०६०५
काठमाडौं नेपालगञ्ज २९५   ७९५५
काठमाडौं जनकपुर १५०   ३५९५
काठमाडौं माउन्टेन उडान ३७५   ९०१०
काठमाडौं तुम्लिङटार २०५   ४९८५
काठमाडौं सिमरा ११५   २६५०