अन्नपूर्ण हिमाल चढ्दै कतारकी राजकुमारी अल्थानी

 मधुजंग पाण्डे/राजधानी

काठमाडौं

हिमाल आरोहणकालागि वर्षकै राम्रो अनुकुल मौसम सुरु भएसँगै अहिले कतारकी राजकुमारी आश्मा अल्थानी अन्नपूर्ण प्रथम हिमाल आरोहण गर्नका लागि म्याग्दी पुगेकी छिन् । 

८ हजार ९१ मिटर अग्लो अन्नपूर्ण प्रथम हिमाल आरोहणकालागि मरुभूमिको देस कतारकी राजकुमारी अल्थानी सोमबार म्याग्दी पुगेकी हुन । सो हिमाल म्याग्दीको अन्नपूर्ण गाउँपालिका–४ मा पर्दछ । 

इलाईट ट्रेकिङ कम्पनीमार्फत उनी अन्नपूर्ण हिमाल आरोहण गर्न म्याग्दी पुगेकी हुन् काठमाडौंबाट अल्थानीको आरोहण टोलीका सदस्य सिम्रिक एयरको हेलिकप्टरमार्फत अन्नपूर्ण गाउँपालिका –३ दानामा पुगेकी हुन् । 

८ हजार मिटर अग्ला विश्वका १४ वटा हिमाल आरोहण गरेर विश्व कीर्तिमानी बनाएका स्वदेशी आरोही निर्मल पुर्जाले अहिले अन्नपूर्ण प्रथम हिमाल आरोहण गर्न लागेकी कतारकी राजकुमारी अल्थानीको आरोहण दलको नेतृत्व गरेका छन् । 

यसअघि संसारको अग्लो सगरमाथा हिमाल आरोहण गर्ने पहिलो अरबी महिलाको कीर्तिमान राखेकी कतारी राजकुमारी अल्थानी अन्नपूर्ण प्रथम हिमाल आरोहण गर्न जाने क्रममा विश्व कीर्तिमानी आरोही निर्मल पुर्जागँगै सोमबार हेलिकोप्टरबाट म्याग्दीको दानामा ओर्लिएकी हुन्।

अल्थानीले यही मार्च महिनामा अन्नपूर्ण प्रथम हिमालको सफल आरोहण गर्ने लक्ष्य राखेकी छिन् । यसअघि विश्वको सर्बोच्च शिखर सगरमाथा, धौलागिरी, कञ्चनजंगा, लोहोत्से, आमादम्बा, मनास्लु, केटु लगायत हिमालको सफल आरोहण गरिसकेकी अल्थानी यसपटक पुनः अन्नपूर्ण हिमाल आरोहणको तयारीमा नेपाली आएकी हुन् ।

उनको यो हिमाल आरोहणको तयारीसँगै कोरोना विश्व महामारिले थलिएर विस्तारै चलायमान हुँदै गरेको मुलुकको पर्यटन प्रवद्र्धनमा एकदमै महत्वपूर्ण भूमिका खेल्ने अपेक्षा गरिएको सम्बन्धीत सरोकारवालाहरुले बताएका छन ।  

उनीहरुले कतारकी राजकुमारी अल्थानीको हिमाल आरोहणले विदेशी पर्यटकबीच अन्य विदेशी आरोहीलाई पनि नेपाल आउन थप आकर्षण गराउने अनुमान गरेका छन । उनको यो साहसिक कदम नेपालको पर्यटन उद्योगकालागि थप उपलब्धीमुलक र फलदायी हुने सम्बन्धीत व्यवसायीहरुको भनाई छ ।   

अन्नपूर्ण हिमाल आरोहणकालागि नेपाल आएकी कतारकी राजकुमारी अल्थानी म्याग्दीको दाना कीर्तिमानी आरोही पुर्जाको जन्मस्थल भएकाले काठमाडौबाट सोझै त्यहाँ पुगेकी हुन ।  राजकुमारी अल्थानी स्वदेशी आरोही निर्मल पुर्जाको जन्मघर दाना पुगेर अवलोकन गर्नुका साथै केही बेर पुर्जाको जन्मघरमा विश्राम गरेकी थिईन । 

अल्थानी र निर्मल पुर्जा मौरिस हर्जोग पदमार्ग पछ्याउँदै आगामी बुधबार बिहान हेलिकोप्टरबाट अन्नपूर्ण साउथ बेसक्याम्प जाने कार्यक्रम तय भएको छ ।

सोमबार हेलिकोप्टरबाट ओर्लेपछि कतारी राजकुमारी अल्थानी र कीर्तिमानी आरोही निर्मल पुर्जालाई स्थानीयवासीले बाजागाजासहित फूलमालाले भव्य स्वागत गरेका थिए ।

सन् २०१९ अप्रिलमा अन्नपुर्ण आरोहणगरी ‘प्रोजेक्ट पोसिवल १४÷७’ अभियान सुरु गरेका स्वदेशी कीर्तिमानी आरोही निर्मल पुर्जाले २९ अक्टोबर २०१९ को बिहान स्थानीय समय अनुसार ८ बजेर ५८ मिनेटमा चीनमा अवस्थित ८ हजार २७ मिटर अग्लो सिसापाङ्मा हिमाल आरोहण गरी पुर्जाले विश्व रेकर्ड तोडेका थिए । 

पुर्जाले संसारका ८ हजार मिटरभन्दा अग्ला सबै १४ हिमाल १ सय ८९ दिन (६ महिना ६ दिन) भित्र आरोहण गरी कोरियाका पर्वतारोही किमच्याङ होको नाममा रहेको ७ वर्ष १० महिना ६ दिनको रेकर्ड समेत तोडेका थिए । कीर्तिमानी आरोही पुर्जाका नाममा अहिले पनि आधा दर्जनभन्दा बढी गिनिज बुकमा वर्ल्ड रेकर्ड कायम छन् । 

अहिले कतारकी राजकुमारी अल्थानीको अन्नपूर्ण प्रथम हिमाल आरोहणकालागि यसरी सहयोग गरिरहेका पूर्जाले भने, ‘यस आरोहणकालागि आवस्यक बन्दोबन्दीका सामग्रीहरु हेलिकप्टरमार्फत अन्नपूर्ण आधार शिविर पुगिसकेको छ । त्यहाँ पुगेका हाम्रा सहयोगीले तयारी थालिसकेका छन् ।’

दानाका पर्यटन व्यवसायी इन्द्रसिंह शेरचनले कतारी राजकुमारी अल्थानीको दाना भ्रमण र अन्नपूर्ण प्रथम हिमाल आरोहणको यात्राले यस क्षेत्रको पर्यटन विकासमा सहयोग पुग्ने अपेक्षा गरिएको बताए । उनले ओझेलमा परेको म्याग्दीको अन्नपूर्ण आधार शिविरको प्रचार–प्रसारमा थप सहयोग पुग्ने बताए । 

यसअघि सन् १९५० को ३ जुनमा फ्रान्सेली नागरिक मौरिज हर्गोजले ८ हजार ९१ मिटर अग्लो अन्नपूर्ण प्रथम हिमालको शिखरमा पहिलो पटक पाइला टेकेका थिए । अन्नपूर्ण ८ हजार मिटर भन्दा अग्लो पहिलो पटक आरोहण भएको हिमाल हो ।

नारच्याङका अगुवाहरुले २०६८ मा अन्नपूर्ण हिमाल र आधार शिविर म्याग्दीमा पर्ने तथ्यसहित मिस्ट्री खोलाको किनारै–किनार आधार शिविर जोड्ने पदमार्ग पहिचान गरेका थिए । फराकिलो फाँट भएकाले दुर्घटनाको कम जोखिम भएको अन्नपूर्ण आधार शिविरमा पुग्न सकिने यो पदमार्ग सबैभन्दा छोटो, रमणीय र सुरक्षित मानिएको छ ।

यस हिमाल आरोहणकालागि जाने क्रममा समुद्री सतहदेखि चारहजार पाँचसय मिटर उचाइमा रहेको अन्नपूर्ण आधार शिविरको प्राकृतिक सौन्दर्ययुक्त दृष्य रमणीय र मनमोहक छ । पदयात्राका क्रममा हिमाल, अग्ला पहाडबाट खसेका झरना, हिमताल र विभिन्न वनस्पति, फूल, चराचुरुङ्गी, वन्यजन्तुको पनि अवलोकन गर्न सकिन्छ । 

खाडी राष्ट्र कतारको राजकुमारी अल्थानीको यो आरोहणको तयारीले अहिले नेपालको हिमाल आरोहणको आकर्षण थप बढाईदिएको पर्यटन विभागले जनाएको छ । उनको यस हिमाल आरोहणले नेपाल भित्रिने पर्यटक आगमन संख्या पनि थप बढाउने विभागको अपेक्षा छ ।