Madhujungpandey

निगमको कामु महाप्रबन्धकमा केसी नियक्त
काठमाडौं– सरकारले नेपाल वायुसेवा निगमको कायम मुकायम महाप्रवन्धकमा निगमकै नायब महाप्रवन्धक राजुबहादुर केसीलाई नियुक्त गरेको छ । 
मन्त्रिपरिषदको गत बिहीबारको निर्णय अनुसार संस्कृति पर्यटन तथा नागरिक उड्डयन मन्त्रालयले आइतबार केसीलाई कामु महाप्रबन्धकमा नियुक्त गरेको हो । यसैगरी सरकारले पर्यटन सचिव यज्ञप्रसाद गौतमलाई निगम सञ्चालक समितिको अध्यक्षमा नियुक्त गरेको छ ।
नवनियुक्त कामु महाप्रबन्धक केसीले आइतबारै कार्यभार सम्हालिसकेका छन् । गत २६ भदौबाट निगमका पूर्व कार्यकारी अध्यक्ष एवं महाप्रवन्धक मनरुप शाहीले राजिनामा दिएपछि एकैपटक दुबै पद खाली भएकाले सरकारले नायब महाप्रबन्धक पदमा कार्यरत केसीलाई कामु महाप्रबन्धकको जिम्मेवारी दिएको हो । सरकारले अब निगममा कुनै विवाद नआउने गरी केसीलाई कामु महाप्रवन्धकको जिम्मेवारी दिएको पर्यटन मन्त्रालयले जनाएको छ । 
केसी विगत ३५ वर्षदेखि निगमको सेवामा कार्यरत छन् । व्यवस्थापनमा स्नाकोत्तर केसीले हालसम्म निगममा वाणिज्य विभाग, संस्थागत विभाग, मानब संसाधन विभाग, नायव महाप्रवन्धक र प्रवक्ता लगायतको जिम्मेवारी पूरा गरेको निगमले जनाएको छ । पदभार ग्रहणपछि आयोजित कार्यक्रममा केसीले निगमका कर्मचारीलाई आपसमा मिलेर काम गर्न आह्वान गरे ।