खराव मौसमका कारण हवाई उडान प्रभावित ,आन्तरिक उडान तीन घण्टा अवरुद्ध

मधुजंग पाण्डे÷राजधानी
काठमाडौ, २४ मंसिर
मौसम खरावीका कारण शनिबार त्रिभुवन अन्तराष्ट्रिय विमानस्थलबाट सञ्चालन हुने आन्तरिक एवं अन्तराष्ट्रिय हवाई उडान प्रभावित भएको छ । काठमाडौको आकासमा लागेको बाक्लो हुस्सु विहान अवेरसम्म नखुलेका कारण विमानस्थलबाट सञ्चालन हुने आन्तरिक एवं अन्तर्राष्ट्रिय उडान करिब तीन घण्डा भन्दाबढीसमयसम्म ढिलो भएको विमानस्थल कार्यालयले जनाएको छ ।
अन्तराष्ट्रिय विमानस्थल कार्यालय स्थित ट्रमिलन शाखाका डियुटी अफिसर केशब भट्टराइले बढ्दो जाडोसँगै उपत्यकाको आकासमा लागेको बाक्लो हुस्सुका कारण शनिबार आन्तरीक र अन्तर्राष्ट्रिय उडान करिब तीन घण्टासम्म ढिलो भएको बताए ।  निकै बेर आकास नखुलेकाले विहान ११ बजे दोहाबाट आउने कतार एयरलाइन्सको जहाज सवा १ वजे मात्र अवतरण गरेको बताए । यसैगरि जेट एयरलाइन्स र गल्फ एयरको नियमित उडान करिब डेढ घन्टासम्म ढिलो भएको जानकारी गराउँदै उनले १० बजे आउनुपर्ने गल्फ एयर साढे १२ बजे मात्र विमानस्थलमा अवतरण गरेको बताए ।  
विहान ६ बजेदेखि नै विमानस्थल सुचारु भइसक्नुपर्ने भएपनि विमानस्थलमा भिजिविलीको मात्रा न्युन रहेकाले साढे १२ बजेपछि मात्र अन्तर्राष्ट्रिय उडान सुचारु भएको भट्टराइले जानकारी दिए ।    
विमानस्थल कार्यालयका महाप्रवन्धक रतिशचन्द्रलाल सुमनले चिसो बढ्ने क्रमसँगै अहिले विमानस्थलको हवाई उडान प्रभावित भएको बताए । खराव मौसमले विहानको नियमित उडान रोकिनासाथ दिनभर त्यसको प्रभाव पर्ने जानकारी गराउँदै सुमनले भने,‘ विग्रदो मौसम र विभिन्न मुलुकबाट आएका अन्तर्राष्ट्रिय उडानमा सञ्चालित हवाई कम्पनीको चापसँगै मुलुककै एकमात्र अन्तर्राष्ट्रिय विमानस्थलको क्षेत्रफल साँघुरिँदै गएका कारण अहिले हवाई उडान प्रभावित भएको हो’।
आन्तरिक उडानमा सञ्चालित विभिन्न कम्पनीका विमान सञ्चालकहरुले दैनिक रुपमा बढ्दै गरेको खराव मौसम र  एयर ट्राफिकको समस्याका कारण अहिले  
हरेक आन्तरिक उडान नियमित समय भन्दा करिब ३ घण्टासम्म ढिलो भएको बताएका छन ।
उनीहरुले एयर ट्राफिकको समस्या र बढ्दो जाडौसँगै विगत केही दिन देखि राजधानीको आकासमा लागेको बाक्लो हुस्सुका कारण आन्तरिक हवाई उडान नराम्रोसँग प्रभावित भएको बताए ।
बुद्ध एयरलाइन्सका बरिष्ठ बजार प्रवन्धक रुपेश जोशीले खराव मौसमका कारण शनिबार विहान ७ बजे काठमाडौबाट पोखरा जानुपर्ने जहाज १०.२० मात्र गएको बताए । यसैगरि विहान काठमाडौबाट विराटनगर, नेपालगन्ज र भैरहवा तर्फ विहान सवा ७ बजे देखि उड्नुपर्ने बुद्धको सबै जहाज ११ बजेपछि मात्र सञ्चालनमा आएको जानकारी गराउँदै उनले मौसम खरावीकै कारण माउन्टेन उडान पनि करिब ३ घण्टासम्म ढिलो भएको बताए ।
उनले हाल अन्तर्राष्ट्रिय उडानका सञ्चालित करिब दुई दर्जन बढी विभिन्न कम्पनीका जहाजको चाप र खराव मौसमले उत्पन्न एयर ट्राफिक जामका कारण मुलुककै हवाई उडान प्रभावित भएको बताए । एयर ट्राफिकको समस्याकै कारण हाल हरेक दिन आन्तरिक उडान करिब ३ घण्टासम्म ढिलो हुने गरेको जानकारी गराउँदै उनले जहाजको सख्या भन्दा विमानस्थलको क्षमता कम भएकाले सो समस्या आएको बताए ।
एयर ट्राफिकको समस्याले जहाज सञ्चालक कम्पनी र यात्रु दुबैलाई गाह्रो हुने बताउँदै जोशीले भने, ‘ बढ्दो एयर ट्राफिकको समस्याले आन्तरिक उडान सञ्चालन हुनै नसक्ने अवस्थामा पुगेका छन ’। हाल एउटा जहाज उडेको ३ घण्टासम्म अर्को उड्न नपाउने र ल्याण्ड गर्दा पनि आधा घण्डासम्म आकासमै होल्ड गर्नुपर्ने बाध्यता भएकाले व्यवसायी र यात्रु मर्कामा परेको उनको गुनासो छ ।
यति एयरलाइन्सका बरिष्ट बजार प्रवन्धक विनय शाक्यले पनि विमानस्थ साँघुरिदै गएका कारण उत्पन्न एयर ट्राफिकको समस्याले आन्तरिक उडान सञ्चालन कठिन भईरहेको बताए । हाल अन्तर्राष्ट्रिय उडानमा रहेका २८ ओटा कम्पनीका करिब ५०  बढी जहाज प्रायः दिउँसो आवत–जावत गर्ने भएकाले सो समस्या आएको जानकारी दिँदै उनले अहिले आन्तरिक उडानमा मात्र दैनिक विभिन्न कम्पनीका करिब २ सय ओटा जहाज राजधानी ओहोर–दोहोर गर्ने गरेको बताए ।     
चिसोसँगै अहिले राजधानीको आकासमा हुस्सुको मात्रा बढेकाले मंसिरको दोस्रो सातादेखि  आन्तरिक उडानमा सञ्चालित केही विमानले नियमित उडान नै स्थगित गर्नुपरेको छ भने अन्तर्राष्ट्रिय जहाजको उडान पनि प्रभावित भईरहेको नेपाल नागरिक उड्डयन प्राधिकरणले जनाएको छ ।