सीपमुलक काम गर्न महिला व्यवसायीलाई श्रम मन्त्रीको सुझाव

काठमाडौ, २ बैशाख – श्रम तथा रोजगार राज्यमन्त्री टेकबहादुर गुरुङले सामान्य कामकालागि पनि विदेशी भूमिमा पुगेर दुःख पाउनुभन्दा स्वदेशमै आत्मनिर्भर हुने खालका व्यवसायीक शिपमुलक कार्यमा लाग्न महिला व्यवसायीहरुलाई सुझाव दिएका छन ।
सौन्दर्यकला व्यवसायीका सृर्जनशिल हातहरुको संघ (एबिसी ह्यान्ड्स) का संस्थापक अध्यक्ष सिता न्यौपाने (पाठक) सहित करिब एक दर्जन सौन्दर्यकला व्यवसायीसँगको भेटमा मन्त्री गुरुङले यस्तो सुझाव दिएका हुन । स्वदेशमै व्यवसायीक शिपमुलक कामबाट आत्मनिर्भर हुने राम्रो सम्भावना हुँदाहुँदैपनि धेरै महिलाहरु वैदेशिक रोजगारीकालागि विभिन्न मुलुकहरुमा पुगेर दुःख पाएर फर्किरहेको सुन्दा निकै दुःख लागेको बताउँदै गुरुङले भने, ‘ न्युन लगानीमा नै केही महिला मिलेर समुह बनाई राम्रो योजना बनाएर  अघि बढ्न सकेमा मासिक २०÷२५ हजार रुपैयाँ कमाउन विदेशिनै पर्दैन’।  अहिले स्वदेशमै व्यवसायीक शिपमुलक काम गरि महिलाहरुलाई आत्मनिर्भर बनाउन राज्यले पनि धेरै पैसा खर्च गरिसकेको जानकारी गराउँदै उनले श्रम स्वीकृति लिएर र श्रम स्वीकृति नै ललिईकन छिमेकी मुलुक भारतीय बाटो हुँदै जानेहरुलाई समेत धेरै पैसा खर्च गरेर विदेशीनुभन्दा स्वदेसमा नै केही गर्न आग्रह गरे ।  उनले अहिले गृहीणीको रुपमा त्यसै घरमा थन्किएर बस्ने महिलाहरुलाई समेत सौन्दर्यकला व्यवसाय लगायत विभिन्न आर्यआर्जन सम्बन्धी शिपमुलक कार्यमा लाग्न प्रेरित गर्न  यस्ता एबिसी ह्यान्ड्स जस्ता संस्थाहरुले पु¥याउँदै आएको योगदानको प्रसंसा गर्दै थप लगनशिल भएर अघि बढ्न समेत सुझाव दिए ।
श्रम तथा रोजगार राज्यमन्त्री गुरुङसँगको भेटमा एबिसी ह्यान्ड्सका संस्थापक अध्यक्ष सिता न्यौपाने (पाठक)ले सौन्दर्य कला व्यवसायीले अहिलेसम्म भोग्दै आएका विविध समस्याका बारेमा जानकारी गराउँदै  यस व्यवसायलाई थप व्यवस्थित र मर्यादित बनाउन सरकारी सहयोग आवस्यक भएको बताएकी थिइन । उनले यस व्यवसायको प्रवद्र्धनकालागि सरकारले बिना धितो निशुल्क व्याजमा ऋण सुविधा उपलब्ध गराउन समेत माग गरेकी थिइन । सो भेटमा सौन्दर्यकला व्यवसायीहरुले अहिले आफुहरुले गरेको यस प्रयासमा सरकारी सहयोग भए यस क्षेत्रलाई थप व्यवस्थित बनाएर अघि बढ्ने बताएका थिए ।